პროგრამის მიზანია, თანამედროვე მოთხოვნების შესაბამისი დონის არქიტექტურის ბაკალავრის აკადემიური ხარისხის მქონე სპეციალისტის მომზადება. სტუდენტები შეისწავლიან არქიტექტურის საფუძვლებს, დაპროექტების ძირითადი პრინციპებსა და მეთოდებს, პროექტირების და მშენებლობის თანამედროვე ტექნოლოგიებს.

კავკასიის უნივერსიტეტის არქიტექტურის პროგრამა საქართველოში არის პირველი და ერთადერთი, რომელსაც ბრიტანეთის სამეფო არქიტექტორთა ინსტიტუტის (RIBA Part1) უპირობო აკრედიტაცია აქვს. 

RIBA-ის წევრობა კავკასიის უნივერსიტეტის არქიტექტურის პროგრამას, მის სტუდენტებსა და კურსდამთავრებულებს ანიჭებს ისეთ უპირატესობებს, როგორიცაა: დიპლომი უმაღლესი ხარისხის ნიშნით, თანამედროვე გამოწვევებზე ორიენტირებული სწავლება, წვდომა RIBA-ის სტუდენტურ პრემიებსა და პრეზიდენტის მედალზე (სადაც უკვე წარდგენილია კავკასიის უნივერსიტეტის სამი სტუდენტური პროექტი); შესაძლებლობა რომ მიიღონ RIBA-ის სტუდენტური ყოველწლიური სტიპენდია, რომელიც ითვალისწინებს სტუდენტების ფულად მხარდაჭერას. ასევე, მსოფლიოში ერთ-ერთი ყველაზე დიდი ბიბლიოთეკის არქიტექტურულ ლიტერატურაზე წვდომა, RIBA-ის კონკურსებსა თუ დისკუსიებში მონაწილეობის შესაძლებლობა, ახალი ნორმებისა თუ რეგულაციების შესახებ მუდმივ ინფორმირება, რადგან RIBA არის არქიტექტურის თანამედროვე ფასეულობებისა და ღირებულებების გარანტი.

პროგრამაში გათვალისწინებული საბაზისო საგნები სახვით ხელოვნებაში, ხაზვაში, მათემატიკასა და კომპიუტერულ პროგრამებში, რაც იძლევა მყარ საფუძველს ინტერიერის დიზაინის, არქიტექტურის დაგეგმარების, ლანდშაფტური არქიტექტურის, კომპიუტერული გრაფიკის და სპეციალობის სხვა საგნების ათვისებისთვის. ამასთანავე პროგრამის ფარგლებში გათვალისწინებული ზოგადი საუნივერსიტეტო და მენეჯერული მეცნიერების საგნები ხელს უწყობს სტუდენტის ინტელექტის ამაღლებას და თვალსაწიერის გაფართოებას.

უცხო ენა

პროგრამა ორიენტირებულია სტუდენტს ღრმად შეასწავლოს ინგლისური ენა, რა მიზნითაც  პროგრამაში გათვალისწინებულია ინგლისური ენის ინტენსიური კურსი.
 

არქიტექტურული პროექტი

პროგრამის ბოლო და ერთ-ერთი ყველაზე მნიშვნელოვანი ნაწილია არქიტექტურული პროექტი. არქიტექტურული პროექტი გულისხმობს სტუდენტის მიერ რეალური არქიტექტურული პროექტის შექმნას და მის საბოლოო პრეზენტაციას. წარმატების უზრუნველყოფის მიზნით პროექტის შექმნის თითოეულ ეტაპზე სტუდენტები მიიღებენ კვალიფიციურ კონსულტაციებს ლექტორებისაგან.

პროფესიული კარიერა:

სტაჟირება და დასაქმება

პროგრამის სტრუქტურა სტუდენტებს საშუალებას აძლევს პროგრამის დასრულებამდე დაიწყონ ზრუნვა პროფესიულ კარიერაზე და დასაქმდნენ მე-3 ან მე-4 კურსიდან. სტუდენტებს ექნებათ საშუალება ჩაერთონ სტაჟირების პროგრამებში ან დაიწყონ სამსახური კავკასიის უნივერსიტეტის დასაქმების სამსახურის დახმარებით.

 
პროფესიული შესაძლებლობები

არქიტექტურის ბაკალავრებს აქვთ საკმაოდ ფართო დასაქმების პერსპექტივები, კერძოდ კი  შესაძლებლობა დასაქმდნენ არქიტექტურულ და საკონსტრუქტორო სახელოსნოებში, სამშენებლო კონპანიებში, საპროექტო და დიზაინ–სტუდიებში.