2025 წლის 7-10 ივლისს, საფრანგეთის ქალაქ ნანტში გამართულ ქცევითი დამოკიდებულების მე-10 საერთაშორისო კონფერენციაზე (ICBA-2025) მოხსენებით წარსდგა კავკასიის უნივერსიტეტის, მედიცინის სკოლის პროგრამის ხელმძღვანელი, პროფესორი ზვიად კირტავა.
კონფერენციაზე, 400-ზე მეტი მონაწილე შეიკრიბა - გამოცდილი ექსპერტები და ახალგაზრდა მკვლევრები მსოფლიოს ყველა კუთხიდან, რომლებსაც საერთო მიზანი აერთიანებდათ: ციფრული ეპოქის ისეთი გამოწვევების სირთულეების დიაგნოსტირება, პრევენცია და მკურნალობა, როგორიცაა ინტერნეტისა და სოციალური მედიის პრობლემური გამოყენება - ინტერნეტ-დამოკიდებულება, ონლაინ აზარტული თამაშები, ონლაინ გეიმინგი, შოპინგისადმი დამოკიდებულება, სმარტფონებზე დამოკიდებულება, კიბერბულინგი და სხვ.
კონფერენციის მონაწილეებმა ერთმანეთს გაუზიარეს, თუ როგორ შეუძლია ციფრული დამოკიდებულების ჭარბ გამოყენებას ხელი შეუშალოს სწავლას, კარიერასა და ურთიერთობებს, ასევე, თუ როგორ შეუძლია ფსიქოლოგიის, ფსიქიატრიის, საზოგადოებრივი ჯანდაცვის, განათლების, ტექნოლოგიებისა და მედიის თანამშრომლობას გადაწყვეტილებების მიღება, ფსიქოლოგიური მდგრადობის აღდგენის და ნამდვილი ადამიანური კავშირის ხელახლა აღმოჩენის მეშვეობით თუ სწორი და დროული ფარმაკოლოგიური მკურნალობით.
“ჩემთვის პატივი იყო, წარმომედგინა პირველი ქართული საპილოტე კვლევა ინტერნეტის პრობლემური გამოყენებისა და მისი სხვადასხვა გამოვლინებების შესახებ თბილისელ ახალგაზრდა სტუდენტებში - რომელიც ჩატარდა კავკასიის უნივერსიტეტსა და შავი ზღვის საერთაშორისო უნივერსიტეტში. ICBA-2025-ზე ძველ ნაცნობებთან და ახალ კოლეგებთან მოსაზრებების გაცვლით გაძლიერებულები, ჩვენ მოუთმენლად ველით ამ კვლევის გაფართოებას, რათა ჩავრთოთ მოზარდებისა და ახალგაზრდების დამატებითი ჯგუფები, რაც მოიცავს ქვეყნის მასშტაბით მეტი უნივერსიტეტისა და კოლეჯის ჩართულობასაც. ჩვენი ამბიციაა როგორც ეროვნული, ასევე საერთაშორისო დაფინანსების უზრუნველყოფა, ახალი პარტნიორობის ჩამოყალიბება და საქართველოს ახალგაზრდების ცხოვრებაში არსებული ციფრული გამოწვევების შესახებ ჩვენი ცოდნის გაფართოების მეშვეობით ფსიქიური ჯანმრთელობის პრობლემების დაძლევა”.
