ლიზი მეგრელიშვილი
კავკასიის სახელმწიფო მართვის სკოლა
Radboud University, Netherlands
კავკასიის უნივერსიტეტში ჩაბარების შემდეგ, ჩემი ერთ-ერთი მთავარი მიზანი Erasmus+ პროგრამაში მონაწილეობა იყო. საბედნიეროდ ამის საშუალება მომეცა და 2020 წლის გაზაფხულის სემესტრი გავატარე რედბაუდის უნივერსიტეტში, ნიდერლანდებში. ამ უნივერსიტეტში გატარებული 6 თვე ნამდვილად გამორჩეული და მრავალფეროვანი იყო. სწავლის სისტემა განსხვავებული იყო, თუმცა ეს სიახლე პროცესს უფრო საინტერესოს ხდიდა. ასევე, ლექციებს ვესწრებოდით უამრავ გაცვლით სტუდენტთან ერთად სხვადასხვა ქვეყნებიდან, რაც საშუალებას გვაძლევდა არა მარტო გავცნობოდით ერთმანეთის კულტურას, არამედ სხვადასხვა კუთხით შეგვეხედა ამა თუ იმ საკითხისთვის.
პანდემიის დაწყების გამო მოგვიწია ონლაინ რეჟიმზე გადასვლა, თუმცა რედბაუდის უნივერსიტეტმა იდეალურად შეძლო ამ გამოწვევასთან თავის გართმევა და ლექციებთან ერთად სხვადასხვა ონლაინ აქტივობებით მაქსიმალურად კომფორტული გარემო შექმნა სუდენტებისთვის. ასევე ჩვენთვის კარგი მოგონებების შექმნაზე ზრუნავდა ESN (Erasmus+ Student Network), რომელიც გვანებივრებდა დაუვიწყარი დღეებით. სამწუხაროდ COVID-19ის გამო საშუალება არ მომეცა ჩემი ყველა გეგმა განმეხორციელებინა, თუმცა სხვადასხვა სირთულეების გადალახვასთან ერთად შევძელი გავმხდარიყავი უფრო დამოუკიდებელი და თავდაჯერებული. საკმაოდ დიდი გამოცდილება მივიღე ამ სემსტრის განმავლობაში, რაც მომავალში ძალიან გამომადგება.
ვფიქრობ, რომ ერაზმუს პროგრამა სტუდენტებს ეხმარება არა მარტო პროფესიულ, არამედ პიროვნულ ზრდაშიც. პირადად მე ყოველთვის ვიამაყებ იმ ფაქტით, რომ მქონდა საშუალება ამ შესანიშნავი პროგრამით მესწავლა ერთ-ერთ საუკეთესო უნივერსიტეტში, ამიტომ ყველა სტუდენტს ვურჩევ გამოიყენოს ეს შესაძლებლობა.
სანდრო სხირტლაძე
კავკასიის ტექნოლოგიების სკოლა
FH JOANNEUM University of Applied Sciences, Austria
კავკასიის უნივერსიტეტში ჩაბარების პირველივე დღიდან მქონდა მიზნად დასახული გაცვლით პროგრამაში მონაწილეობის მიღება. რამდენიმე წლის განმავლობაში თავდაჯერებულობის და შრომის ფასად შევძელი 2020 წლის გაზაფხულის სემესტრში ავსტრიაში მესწავლა. არც ისე მარტივი იყო, უცხო ქვეყანაში მარტო ჩასვლა და ცხოვრება, თუმცა ყველანაირი სირთულის მიუხედავად, შევიძინე მეგობრები მსოფლიოს სხვადასხვა კუთხიდან, მივიღე უცხოელ სტუდენტებთან ურთიერთობის გამოცდილება, გავხდი დამოუკიდებელი ადამიანი და რაც მთავარია, მივიღე ევროპული დონის განათლება.
გაცვლით პროგრამაში მონაწილეობა დაუვიწყარი ცხოვრებისეული გამოცდილებაა, რომელიც ცვლის ადამიანს და მის მსოფლმხედველობას. ვისურვებდი, რომ ბევრს ჰქონდეს უცხოეთში სწავლის და ცხოვრების შანსი.
ვალერია კიკვიძე
კავკასიის ბიზნესის სკოლა
University of Valladolid, Spain
ერაზმუს + ის პროგრამაში მონაწილეობის უზარმაზარი სურვილი მქონდა. გამიმართლა და ასეთი გამოცდილება მივიღე სასურველ ქვეყანაში. პანდემიის პერიოდის მიუხედავად, რომელიც საკმაოდ რთული იყო მთელი მსოფლიოსთვის, ვერ ვიქნები უკმაყოფილო ჩემი თავგადასავლებით. ESN (ერაზმუსის სტუდენტური ქსელი) ყოველთვის მაქსიმალურად ცდილობდა ივენთების დაგეგმვასა და შთამბეჭდავი მოგონებების შექმნას.
მინდა ვთქვა, რომ ასეთი შესაძლებლობა ნამდვილად მშვენიერია და ეს შანსი არ უნდა გაუშვა ხელიდან. ხალხის გაცნობა, ცვლილება, ახლის ცდა და კომფორტის ზონიდან გასვლა ცხოვრების სულ სხვა პერსპექტივას გაჩვენებს. ეს სემესტრი ჩემთვის აღტაცებებით სავსე პერიოდად დამამახსოვრდა და მუდამ მემახსოვრება.
მარიამ უჯმაჯურიძე
კავკასიის ბიზნესის სკოლა
FH JOANNEUM University of Applied Sciences, Austria
ჩემთვის კავკასიის უნივერსიტეტის არჩევის ერთ-ერთ მთავარ მიზეზს ერაზმუსის გაცვლითი პროგრამა წარმოადგენდა. ამ პროგრამის შესახებ ბევრი რამ მსმენია და თავიდანვე მიზნად მქონდა დასახული მასში მონაწილეობის მიღება. ამიტომაც, როცა შესაძლებლობა მომეცა ავსტრიაში, FH JOANNEUM, University of Applied Sciences-ში მესწავლა ერთი სემესტრით, მეც დიდი სიამოვნებით დავთანხმდი ამ შემოთავაზებას. ავსტრიამ და კერძოდ გრაცმა პირველი დღიდანვე მომხიბლა მისი სილამაზით, მშვიდი გარემოთი და სასიამოვნო ხალხით.
უნივერსიტეტში სწავლის პროცესი ჩვენგან განსხვავებული, მაგრამ საინტერესო იყო. სხვადასხვა ქვეყნიდან მოწვეული ლექტორები მაქსიმალურად ცდილობდნენ რომ ონლაინ რეჟიმშიც კი, სალექციო პროცესი ინტერაქტიული და საინტერესო ყოფილიყო. უნდა აღვნიშნო ისიც, რომ Covid19-ის პანდემიის პერიოდში უნივერსიტეტი მაქსიმალურად ცდილობდა ეზრუნა სტუდენტების უსაფრთხოებაზე და მათთვის სტრესული გარემოს შემსუბუქებაზე. რა თქმა უნდა, პანდემიამ გარკვეული გეგმების განხორციელებაში ხელი შემიშალა, მაგრამ მიუხედავად ამისა ამ სემესტრის განმავლობაში ძალიან ბევრი რამ ვისწავლე. გავხდი უფრო მეტად დამოუკიდებელი, ვისწავლე სხვადასხვა ეროვნების სტუდენტებთან ერთად მუშაობა ჯგუფურ პროექტებზე და გავეცანი მათ კულტურას, ასევე დავიწყე გერმანული ენის შესწავლაც.
ჩემი აზრით, ეს პროგრამა საუკეთესო გზაა საკუთარი თავის გაცნობისა და პიროვნული ზრდისთვის, ამიტომაც ყველა სტუდენტს ვურჩევ შესაძლებლობის შემთხვევაში ამ პროგრამაში მონაწილეობის მიღებას.
ცოტნე კიტოვანი
Cracow University of Economics, Poland
კავკასიის ბიზნესის სკოლა
ერაზმუსის პროექტის ფარგლებში ერთი სემესტრი ვისწავლე პოლონეთში, კრაკოვის ეკონომიკის უნივერსიტეტში. ჩემი ყოველდღიურობა სავსე იყო სიახლეებით და თავგადასავლებით. ურთიერთობა მქონდა მსოფლიოს ყველა კუთხიდან ჩამოსულ სტუდენტთან და მათთან ერთად დიდი ინტერესით ვესწრებოდი ლექციებს. ამ დროის განმავლობაში დაუვიწყარი და განუმეორებელი შთაბეჭდილებები დავაგროვე, ბევრი ვიმოგზაურე და შევიცანი ევროპული კულტურა სხვადასხვა ქვეყნის გადმოსახედიდან.
ერაზმუსის პროგრამამ მნიშვნელოვანი როლი ითამაშა ჩემი პიროვნული ზრდის თვალსაზრისით, ახალი შეხედულებითა და იდეებით სამშობლოში დაბრუნებულმა, გავაცნობიერე რომ ახლა უფრო შრომისმოყვარე და დამოუკიდებელი ვარ. ამ პროექტში მონაწილეობა ჩემი ცხოვრების ერთ-ერთი საუკეთესო გადაწყვეტილება იყო და დიდ მადლობას ვუხდი კავკასიის უნივერსიტეტს ასეთი შესაძლებლობის მოცემისთვის!
ნინო ფილაური
Frederick University, Cyprus
კავკასიის ბიზნესის სკოლა
როდესაც გავიგე რომ გაცვლითი პროგრამით კვიპროსში მივდიოდი, მაშინვე მივხვდი რომ დაუვიწყარი და ბედნიერებით სავსე დღეები და თავგადასავალი მელოდა. Erasmus+ ის პროგრამამ საშუალება მომცა, უდიდესი გამოცდილება მიმეღო, მესწავლა და მეცხოვრა საზღვარგარეთ, გავცნობოდი სხვა ქვეყანასა და კულტურას, შევხვედროდი უამრავი ეროვნების ადამიანს. ამ 4 თვის განმავლობაში უამრავი მეგობარი შევიძინე, ვიმოგზაურე და რაც ყველაზე მთავარია, დამოუკიდებელი და ძლერი გავხდი. გავეცანი სწავლის სხვადასხვა მეთოდს, რამაც ცხოვრება და სწავლის პროცესი უცხო ქვეყანაში, საინტერესო გახადა.
ESN (Erasmus+ Students Network) კი ყოველდღიურად ცდილობდა, თითოეული დღე დაუვიწყარ მოგონებად ექცია. ახლა კი ზუსტად ვიცი, ეს იყო ყველაზე ნაყოფიერი სემესტრი და ცხოვრების ის ეტაპი, რომელმაც კარიერულად და პიროვნულად ძალიან გამზარდა და ჩამომაყალიბა. ეს იყო საუკეთესო გადაწყვეტილება და შანსი, რომელიც უნივერსიტეტმა მომცა!
ნიკოლოზ კაცაძე
Kaunas University of Technology, Lithuania
კავკასიის ბიზნესის სკოლა
ჩემი ცხოვრების საუკეთესო პერიოდი კავკასიის უნივერსიტეტში მოხვედრის შემდეგ, Erasmus + ის გაცვლითი პროგრამაში მონაწილეობის მიღებაა. 1 სემესტრი გავატარე კაუნასის ტექნოლოგიურ უნივერსიტეტში (Kaunas University of Technology). უნივერსიტეტმა ჩემზე დიდი შთაბეჭდილება მოახდინა. ეს ყველაფერი ჩემთვის ახალი გამოწვევა იყო - გარემო, ხალხი, მათი დამოკიდებულება ჩვენდამი, სწავლების ევროპული მეთოდი, ურთიერთობა სხვადასხვა ქვეყნიდან ჩამოსულ სტუდენტებთან.
ერთად ვსწავლობდით, ერთად ვმოგზაურობდით, ვუზიარებდით ერთმანეთს ჩვენი ქვეყნის ტრადიციებსა და კულტურას, სწავლის მეთოდებს და ა.შ. კაუნასის ტექნოლოგიური უნივერსიტეტი ჩემთვის გახდა ცხოვრების ახალი რიტმი, ახალი გამოწვევების დასაწყისი. იქ სწავლება იმაზე საინტერესო აღმოჩნდა ვიდრე ოდესმე წარმოვიდგენდი. Erasmus + პროგრამამ დამეხმარა როგორც პიროვნულ, ისე პროფესიულ განვითარებაში და ვიმედოვნებ უფრო ბევრ სტუდენტს მიეცემა ამ პროგრამაში მონაწილეობის შესაძლებლობა.
ნელი პაპიაშვილი
National University of Political Studies and Public Administration, Romania 
კავკასიის ეკონომიკის სკოლა
სკოლის პერიოდიდან გაცნობიერებული მქონდა, რომ მსურდა მიმეღო განათლება საზღვარგარეთ. კავკასიის უნივერსიტეტისა და Erasmus+ პროგრამის დახმარებით, 2019 წლის შემოდგომის სემესტრისთვის გავემგზავრე ბუქარესტში. ბუქარესტი საკმაოდ საინტერესო ქალაქია, მას მცირე პარიზს ან აღმოსავლეთის პარიზსაც კი უწოდებენ ელეგანტური და თანამედროვე არქიტექტურის გამო.
რუმინელები საოცრად თბილი, ყურადღებიანი და ენერგიული ადამიანები არიან. ამ ფაქტორმა გამიადვილა და საინტერესო გახადა ჩემი ცხოვრება უცხო ქვეყანაში. ჩემთვის ყოველთვის გარკვეულ გამოწვევას წარმოადგენდა დამოუკიდებლად ცხოვრება, მოგზაურობა ქვეყნებში, სრულიად განსხვავებულ კულტურასთან და განათლების სისტემასთან ადაპტაცია. ვფიქრობ, Erasmus+ პროგრამა დამეხმარა გავზრდილიყავი პიროვნულად და შემეძინა მეგობრები სხვადასხვა ქვეყნიდან. მადლობა კავკასიის უნივერსიტეტს და ერაზმუსის პროგრამას ამ შესაძლებლობისათვის.
მაკა ქორიძე
FH JOANNEUM, University of Applied Sciences, Austria
კავკასიის ბიზნესის სკოლა
კავკასიის უნივერსიტეტში ჩაბარების ერთ-ერთი მიზეზი იყო ერაზმუსის გაცვლით პროგრამაში მონაწილეობის მიღების სურვილი. შესაბამისად, შესაძლებლობის გამოჩენისთანავე მივიღე წასვლის გადაწყვეტილება და გავემგზავრე ავსტრიაში, გრაცში. რა თქმა უნდა, თავიდანვე გააზრებული მქონდა რომ წინ, აქამდე ჩემთვის უცნობი გამოწვევები შემხვდებოდა, განსხვავებული ცხოვრების სტილისა და სწავლების მეთოდებიდან გამომდინარე. ჩასვლისთანავე მოვიხიბლე ამ პატარა, საუნივერსიტეტო ქალაქით, ხოლო მიმღებმა უნივერსიტეტმა მოლოდინს გადააჭარბა.
სწავლის სისტემა განსხვავებული იყო ჩვენი უნივერსიტეტისგან, თუმცა არ იყო რთული და საკმაოდ საინტერესო აღმოჩნდა. ლექტორები, რომლებიც ძირითადად მსოფლიოს სხვადასხვა ქვეყნიდან იყვნენ მოწვეულნი, აქტიურად გვიზიარებდნენ თავიანთ პროფესიულ გამოცდილებას, გვთავაზობდნენ ძალიან საინტერესო და ინტერაქტიულ ლექციებსა და ჯგუფურ აქტივობებს იმისათვის, რომ დავმეგობრებულიყავით ჯგუფელებთან და ერთმანეთისთვის გაგვეცნო ჩვენი ქვეყნის კულტურა და ცხოვრების წესი. გრაცში გატარებული დროის განმავლობაში, შევიძინე ცოდნა და უნარ-ჩვევები, რომლებიც მომავალში დამეხმარება პროფესიულ განვითარებაში. ეს ნამდვილად იყო ერთ-ერთი საუკეთესო გადაწყვეტილება ჩემს ცხოვრებაში და ვთვლი, რომ სტუდენტებმა შესაძლებლობის გამოჩენისთანავე უნდა მიიღონ მონაწილეობა ამ პროგრამაში.
მაია ყოჩიაშვილი 
University of Alcala, Spain
კავკასიის ეკონომიკის სკოლა
Erasmus+ ის პროგრამით საზღვარგარეთ წასვლა სტუდენტური ცხოვრების საუკეთესო ნაწილად მიმაჩნია. უნივერსიტეტში ჩაბარებისთანავე მიზნად დავისახე, ერთი სემესტრით ევროპის რომელიმე უნივერსიტეტში წავსულიყავი სასწავლებლად. ალკალას უნივერსიტეტი ამ მიზნის მიღეწევაში დამეხმარა. იმის გარდა, რომ ინგლისური ენის დონე ავიმაღლე, ცხოვრებისეული გამოცდილებაც მივიღე.
5 თვის განმავლობაში სხვა ქვეყანაში ყოფნის შედეგად ხდები უფრო დამოუკიდებელი და იწყებ უფრო სხარტად აზროვნებას, თავად გიწევს გამოსავლის ძიება რთული სიტუაციებიდან. ეცნობი ახალ კულტურას, იძენ მეგობრებს. ყველაფერთან ერთად უკან ბრუნდები მეტად თავდაჯერებული, იგროვებ უამრავ ბედნიერ მოგონებას, რომელიც ცხოვრების ბოლომდე გაგყვება. გაცვლითი პროგრამა გეხმარება როგორც კარიერულ წინსვლაში, ასევე პიროვნულ განვითარებაში.
თამარ ნოზაძე
Budapest Metropolitan University, Hungary
კავკასიის ბიზნესის სკოლა
Erasmus+ ის გაცვლით პროგრამაში მონაწილეობა სპონტანურად გადავწყვიტე. ევროპული სტანდარტებით სწავლის გარდა, მივიღე უდიდესი ცხოვრებისეული გამოცდილება, ბევრი ვიმოგზაურე, შევიძინე ახალი მეგობრები სხვადასხვა ქვეყნიდან და შევძელი გამოვსულიყავი კომფორტის ზონიდან.
მიუხედავად სირთულეებისა, ეს პერიოდი კარგად გამახსენდება და ძალიან მომენატრება ბუდაპეშტში, მეტროპოლიტენის უნივერსიტეტში გატარებული დღეები. ვფიქრობ, რომ უნგრეთიდან პიროვნულად გაზრდილი და უფრო დამოუკიდებელი ადამიანი ჩამოვედი. მადლობა კავკასიის უნივერსიტეტს და ერაზმუსის პროგრამას ამ შანსისთვის, რომელიც ვფიქრობ, ყველა სტუდენტმა აუცილებლად უნდა გამოიყენოს.
ელენე ენუქიძე
Budapest Metropolitan University, Hungary
კავკასიის ბიზნესის სკოლა
კავკასიის უნივერსიტეტის გაცვლითი პროგრამით ჯერ კიდევ აბიტურიენტობისას დავინტერესდი, რამაც დიდი გავლენა მოახდინა ჩემს სამომავლო არჩევანზე. მიუხედავად იმისა, რომ ერაზმუსისთვის პირველივე კურსიდან ვემზადებოდი და გააზრებული მქონდა, რომ კარგი სწავლის შემთხვევაში ერთ სემესტრს საზღვარგარეთ გავატარებდი, ოჯახისა და მეგობრებისგან მოშორებით, უცხო ქვეყანაში დამოუკიდებლად ცხოვრება მაინც საკმაოდ რთული აღმოჩნდა.
ძალიან გამიმართლა Erasmus+ ის მიმღებ უნივერსიტეტში, რადგან ის არამარტო კარგად სწავლაზე, არამედ სტუდენტების დაახლოებასა და team building აქტივობებზეც იყო კონცენტრირებული, ამიტომაც სასწავლო პროცესის დაწყებამდე ჩემს მომავალ ჯგუფელებს პირველად უნივერსიტეტის ერთ-ერთ ივენთზე Welcome Day-ზე შევხვდი. Team building თამაშები, პიკნიკი, სპორტული შეჯიბრებები, უამრავი წამახალისებელი პრიზი და ბოლოს 3 საათიანი კრუიზი დუნაიზე სტუდენტებთან ერთად, რომლებიც საქართველოში დაბრუნების მიუხედავად, დღესაც ჩემი ყოველდღიური ცხოვრების განუყოფელ ნაწილს წარმოადგენენ. ეს ნამდვილად იყო საუკეთესო სემესტრის საუკეთესო დასაწყისი.
სწავლების მეთოდი METU-სა და CU-ის შორის გარკვეულწილად განსხვავებული იყო, თუმცა ამას ხელი არ შეუშლია სემესტრი წარმატებით დამესრულებინა. უფრო მეტიც, ვცდილობდი საკმაოდ აქტიური სტუდენტი ვყოფილიყავი, რასაც უნგრელი ლექტორები ძალიან დადებითად აფასებდნენ.
პროგრამის დასასრულს კი, ვფიქრობ, რომ ეს არის შანსი, რომელიც ხელიდან არცერთმა სტუდენტმა არ უნდა გაუშვას, ამის მიზეზების სია საკმაოდ ვრცელია.
ეს არის შესაძლებლობა უკეთ გაიცნო საკუთარი თავი, უკეთ აღმოაჩინო შენი სუსტი და ძლიერი მხარეები, შეისწავლო ახალი ენა და კულტურა, შეხვდე უამრავ საინტერესო ადამიანს, შეიძინო ახალი მეგობრები, იმოგზაურო და განვითარდე, როგორც კარიერულად, ასევე პიროვნულად.
ანა თედიაშვილი
FH JOANNEUM, University of Applied Sciences, Austria
კავკასიის ბიზნესის სკოლა
ჩემი ისტორია იწყება ავსტრიის ულამაზეს ქალაქში, რომელმაც შესაძლებლობა მომცა, შემექმნა ჩემი ცხოვრების ახალი სტილი - განსხვავებული, აქტიური, სიახლეებით სავსე და რაც მთავარია, ორიენტირებული ევროპული გამოცდილებისა და განათლების მიღებაზე.
უნივერსიტეტში სწავლისას აღმოვაჩინე ბევრი სიახლე, განსაკუთრებით მომეწონა მოდულური სისტემით სწავლება, რამაც შესაძლებლობა მომცა, დრო სწორად გამენაწილებინა და არა მხოლოდ ავსტრია, არამედ ევროპის სხვა ქვეყნებიც განსხვავებული კუთხით დამენახა, მემოგზაურა ბევრი და მეგრძნო თავი იმ დიდი ჯგუფის ნაწილად, რასაც ევროპული ოჯახი ჰქვია. პროგრამამ მომცა საშუალება გამეზიარებინა სხვა ადამიანების კულტურა და ამავდროულად გამეცნო ჩემი ქვეყანა სხვებისთვის.
თავდაჯერებულობა და მიზნისკენ სწრაფვა არის ის, რაც შემძინა ამ გამოცდილებამ. დავრწმუნდი, რომ შეუზღუდავია შესაძლებლობები, როცა გაქვს ხედვა და გინდა მიიღო შენი ცხოვრების ყველაზე მნიშვნელოვანი, დამოუკიდებლად ცხოვრების გამოცდილება.
მადლობა კავკასიის უნივერსიტეტსა და ერაზმუსის პროგრამას ამ შესაძლებლობისთვის.
და ბოლოს, Auf Wiedersehen!
თინათინ ბაქრაძე
Budapest Metropolitan University, Hungary
კავკასიის მედიის სკოლა
საზღვარგარეთ ცხოვრებისა და სწავლის შანსი ხელიდან არავინ უნდა გაუშვას. უცხო კულტურა, ახალი მეგობრები, ლექტორები და განსხვავებული სასწავლო გარემო ძალიან დიდ როლს თამაშობს ადამიანის პიროვნულ და პროფესიულ განვითარებაზე. პირველივე კურსიდან მოუთმენლად ველოდი "ერაზმუსის" პროგრამის გამოცხადებას და ძალინ ბედნიერი ვიყავი, როცა ბუდაპეშტის მეტროპოლიტენის უნივერსიტეტში მიმიღეს. ეს სასწავლებელი უცხოელ სტუდენტთა სიმრავლით გამოირჩევა და მორგებულია თანამედროვე სასწავლო მეთოდებს. უკვე ვიცი, რომ აქ გატარებული ერთი სემესტრი ჩემი ცხოვრების ერთ-ერთი საუკეთესო პერიოდი იქნება.
ანა მარტიაშვილი
Lille Catholic University, France
კავკასიის ბიზნესის სკოლა
საფრანგეთში გამგზავრება ნამდვილად არ ყოფილა დაგეგმილი, ეს იყო სპონტანური აზრის გაელვება, რომელიც რამდენიმე თვეში რეალობად იქცა. აღუწერელია ბედნიერი და სასიამოვნო მომენტები: გავიცანი ბევრი ეროვნების ადამიანი, ვიმოგზაურე ევროპის ქვეყნებში და შევიძინე ახალი თვისებები და უნარები. ჩემთვის წარმოუდგენელი იყო ის ფაქტი, რომ გაცვლით სტუდენტებს (სხვადასხვა ქვეყნის წარმომადგენლებს) იუმორიც კი , ის რაც ჩვენ ყველას გვაერთიანებს და გვაკავშირებს, განსხვავებული გვექნებოდა.
ერთადერთ დაბრკოლებას, რომელსაც გადავაწყდი იყო უცხო გარემოსთან შეგუება. ახალი ცხოვრების რიტმი და სწავლის სისტემა, მაგრამ ლილის კათოლიკური უნივერსიტეტის ადმინისტრაცია ყოველთვის მზად არის მხარდაჭერისა და დახმარებისთვის.
ერაზმუს+ ის გაცვლითმა პროგრამამ მომცა საშუალება განვვითარებულიყავი როგორც პიროვნება , მქონოდა დაუვიწყარი თავგადასავლები და განცდები.
ლუკა ფოცხიშვილი
University of Valladolid, Spain
კავკასიის ბიზნესის სკოლა
ვალადოლიდში ცხოვრება და სწავლა შეუდარებელი გამოცდილებაა. ვფიქრობ, რომ აქ მიღებული ცოდნა არა მარტო კარიერული წინსვლის დასაბამია, არამედ პიროვნული განვითარებისაც. წინასწარ რთული ჩანდა დამოუკიდებლად ცხოვრება 5 თვის განმავლობაში, მაგრამ უნივერსიტეტს ისეთი ატმოსფერო აქვს, რომ ადაპტირება მაქსიმალურად მარტივი ხდება. ჩემი აზრით, ერაზმუსის პროგრამაში მონაწილეობა ისეთი გამოცდილებაა, რომელიც გარკვეულ ეტაპზე ყველა პერსპექტიულმა და ამბიციურმა სტუდენტმა უნდა მიიღოს, რადგან პროექტის შემდეგ ფაქტიურად უფრო მიზანსწრაფული, შრომისმოყვარე, დამოუკიდებელი და ენერგიული უბრუნდები სამშობლოს.
მარიამ ნინიკელაშვილი
Lille Catholic University, France
კავკასიის ბიზნესის სკოლა
ჯერ კიდევ საფრანგეთში ჩამოსვლამდე ვიცოდი, რომ წინ მრავალი საინტერესო და ფერადი თავგადასავალი მელოდა, თუმცა რეალობამ მოლოდინს გადააჭარბა.განსხვავებულმა სასწავლო სისტემამ, მსოფლიოს სხვადასხვა ქვეყნის წარმომადგენელ სტუდენტებთან კონტაქტმა, ადგილობრივმა ლექტორებმა, ფრანგებთან ყოველდღიურმა ურთიერთობამ, მნიშვნელოვანი გამოცდილება მომცა და გარკვეული წვლილი შეიტანა ჩემი როგორც პიროვნული, ისე პროფესიული განვითარების საკითხში.საფრანგეთში სწავლა და დამოუკიდებლად ცხოვრება უდიდესი გამოწვევა იყო ჩემთვის. ვფიქრობ, ჩემი პიროვნული თვისებები და სიახლეებისადმი სწრაფვა დამეხმარა მარტივად დამეძლია ცხოვრების ეს ახალი ეტაპი. მიმაჩნია, რომ საფრანგეთი საუკეთესო ადგილია სტუდენტური ცხოვრებისა და მოგზაურობისთვის. აქ წამოსვალა ერთ–ერთი ყველაზე საუკეთესო გადაწყვეტილება იყო ჩემს ცხოვრებაში
University of Valladolid, Spain
ჯუბა ყურაშვილი
კავკასიის ბიზნესის სკოლა
გაცვლითი პროგრამის მთავარი გამოწვევა ჩემთვის იყო დამოუკიდებელი ცხოვრება, საყვარელი ადამიანებისგან შორს ყოფნა კი გამიადვილა მიზანმა, მიმეღო ევროპული ცხოვრების გამოცდილება და მაღალი ხარისხის განათლება. ესპანელები საოცრად თბილი, პოზიტიური ადამიანები არიან და აქვთ იდეალურთან მიახლოვებული საზოგადოებრივი კულტურა. აქ დავინახე როგორი მინდა იყოს ჩვენი ქვეყანა და საზოგადოება. განათლება ესპანეთში არის პრაქტიკაზე ორიენტირებული, რაც ძალიან მომწონს.
აღსანიშნავია ისიც, რომ ვალადოლიდის უნივერსიტეტში, ამ პროგრამის ფარგლებში მოპოვებული კრედიტები, კავკასიის უნივერსიტეტის პროგრამასთან სრულად თავსებადია.
მადლობა ერასმუსის პროგრამასა და კავკასიის უნივერსიტეტს ასეთი შესაძლებლობის მოცემისთვის!
Lille Catholic University, France
იმა-შალომ ქათამაძე, ირინა მუგდუსი, ანა ასლამაზაშვილი, რევაზ მაისურაძე, თორნიკე კვინიკაძე, ანა გორდულაძე
კავკასიის სახელმწიფო მართვის სკოლა/ კავკასიის ეკონომიკის სკოლა/ კავკასიის სამართლის სკოლა
ევროპაში, კერძოდ კი, საფრანგეთში გაცვლითი პროგრამით წასვლა ჩვენთვის ძალიან მნიშვნელოვანია. ლილის კათოლიკური უნივერსიტეტი ერთ-ერთი უძველესი და ყველაზე დიდი კერძო უნივერსიტეტია, სადაც სტუდენტები მსოფლიოს ყველა კუთხიდან ჩამოდიან. მოგვეცა შანსი მიგვეღო უდიდესი გამოცდილება, როგორც განსხვავებულ გარემოში სწავლის, ასევე ცხოვრების და პირადი განვითარების კუთხით. სწავლის სისტემა, ლექტორები, გრაფიკი, ყველაფერი ახალი და განსხვავებულია. ავითვისეთ ენა, გავიცანით უამრავი სტუდენტი სხვადასხვა ქვეყნიდან, შევიძინეთ მეგობრები და ვისწავლეთ დამოუკიდებლობა, რაც აუცილებლად აისახება ჩვენს მომავალსა და კარიერაზე. დიდი მადლობა კავკასიის უნივერსიტეტს ამ შესაძლებლობისთვის, იმისთვის რომ ძალიან წარმატებულია ერაზმუსის გაცვლითი პროგრამების მიმართულებით და გვაძლევს შანსს, თუნდაც ერთი სემესტრი გავატაროთ მსოფლიოს სხვადასხვა უნივერსიტეტში. ეს გამოცდილება ნამდვილად დაუვიწყარი იქნება თითოეული ჩვენგანისთვის!.
University of TUSCIA, Italy
ლილე ჯიქია, ანა პატაშური, ნათია თავდგირიძე, სულხან თებიძე, თეონა ფევაძე, თამარ სურმანიძე
კავკასიის ბიზნესის სკოლა / კავკასიის ეკონომიკის სკოლა
ერაზმუსმა მოგვცა შანსი იმისა, რომ წავსულიყავით საზღვარგარეთ და
გავცნობოდით ცხოვრების რადიკალურად განსხვავებულ სტილს. ეს არის ახალი
აღმოჩენების პერიოდი თითოეული ჩვენგანის ცხოვრებაში, ახალი გამოწვევები, ბევრი
მეგობარი, თავგადასავლები, შესაძლებლობა კარიერული განვითარებისა და პიროვნული
ზრდისთვის. მეტიც, ჩვენ გვეძლევა საშუალება იმისა, რომ აქ მიღებული ცოდნა
დაბრუნებისთანავე გამოვიყენოთ სამშობლოს წინსვლისთვის.
FH JOANNEUM University of Applied Sciences, Graz, Austria
გიგა კუთხაშვილი
Servus!
.JPG)
ევროპის გულში განათლების თუნდაც ერთი სემესტრით მიღება და უცხოელ სტუდენტებთან ყოველდღიური კონტაქტი უნიკალური და ჩემი ცხოვრების უმნიშვნელოვანესი გამოცდილებაა. მუდმივად სხვადასხვა კულტურის წარმომადგენლებთან ურთიერთობა და მათთან ინფორმაციის მიმოცვლა ავსტრიაში ყოფნას ნამდვილად საინტერესოს ხდის. ვფიქრობ, რომ ეს პერიოდი ჩემს პროფესიულ განვითარებას მნიშვნელოვნად შეუწყობს ხელს. დღეს უკვე ღიმილს მგვრის წამოსვლამდე განცდილი მღელვარება, რადგან აქაური გარემო არაფერია თუ არა ის, საითაც საქართველო მიისწრაფვის.
University of Szczecin, Poland
გუგა ჯულუხიძე
მიუხედავად იმისა, რომ შჩეჩინის უნივერსიტეტი მხოლოდ 25 წლის წინ დაარსდა, აღნიშნული უმაღლესი სასწავლებელი ძალიან ბევრ კვლევით შესაძლებლობას გთავაზობს: ლაბორატორიებს, ბიბლიოთეკებს, სამეცნიერო კონფერეციებსა და სემინარებს. ჩემთვის, როგორც დოქტორანტურის დამამთავრებელი კურსის სტუდენტისათვის უმნიშვნელოვანესი იყო პირდაპირი კონტაქტი აკადემიურ პერსონალთან და მათთან მუდმივი კონსულტაცია. გარდა ამისა, უნივერსიტეტი მუდმივად ხელს გიწყობს სადოქტორო კვლევისათვის აუცილებელ ღონისძიებებში მონაწილეობის მიღებაში სრულიად პოლონეთის მასშტაბით.
გამომდინარე იქიდან, რომ მომეცა საშუალება მყოლოდა ადგილობრივი სამეცნიერო ხელმძღვანელიც, მნიშვნელოვნად გამიმარტივდა უნივერსიტეტთან ადაპტაცია და რაც მთავარია, ნაყოფიერი კვლევის ჩატარება.
ერთი სიტყვით, შჩეჩინის უნივერსიტეტმა სრულად გაამართლა ის მოლოდინი, რომელიც მე, სადოქტორო საფეხურის სტუდენტს და ამავდროულად მკვლევარს შეიძლებოდა ჰქონოდა.
Lille Catholic University, France
თეონა ხელაძე
უცხო ქვეყანაში სწავლა და ცხოვრება გამოწვევა იყი ჩემთვის, თუმცა უნდა ითქვას, რომ საკმაოდ დიდი გამოცდილება მივიღე და ეს გამოწვევაც დავძლიე. ფრანგებთან ურთიერთობა, განსხვავებული სწავლის მეთოდი, უცხოელი ლექტორები და სტუდენტები, მსოფლიო ქალაქებიდან, ჩემი ცხოვრების დიდი სიახლე იყო, რაც დამეხმარა როგორც პიროვნულ, ისე პროფესიულ გაზრდასა და განვითარებაში. ეს გამოცდილება, ვფიქრობ, დიდი ნაბიჯი იქნება ჩემი კარიერული წინსვლისთვის.
University of TUSCIA, Italy
მარიამ კასრაძე
თბილისიდან წამოსვლის დღეს, ჯერ კიდევ თვითმფრინავის აფრენის მომენტში ვიგრძენი, რომ რაღაც საოცარ სიახლეში, თავგადასავალში ვდგამდი ფეხს და დღესაც, ყოველ დილით ამ შეგრძნებით ვიღვიძებ. უკვე წარმოუდგენლად ბევრი რამ მასწავლა უცხო ქვეყანაში მარტო ცხოვრებამ და დარწმუნებული ვარ წინ კიდევ ძალიან ბევრი გამოწვევა მელის. 5 თვე შესაძლოა ძალიან დიდი დრო არ იყოს, თუმცა სრულიად საკმარისია საკუთარ თავში ცოტათი უფრო გაერკვე, პიროვნულად განვითარდე და ახალი იდეებით ავსებული დაბრუნდე საკუთარ ქვეყანაში.
University of Economics in Katowice, Poland
სალომე კაციტაძე
ერაზმუსი გვაძლევს უნიკალურ შანსს ვიცხოვროთ სრულიად დამოუკიდებლად ევროპის ზონაში და უკეთ შევიცნოთ საკუთარი თავი. აქ ცხოვრების პერიოდში, ჩამომიყალიბდა განსხვავებული შეხედულებები და გავეცანი თანამედროვე ტრენდებს, რაც ვფიქრობ, სამომავლოდ გამომადგება კარიერულ წინსვლაში. რა თქმა უნდა, ამისათვის დიდი მადლობა კავკასიის უნივერსიტეტს.
|
KOC University, Turkey
ქეთევან გაგოშიძე ნუცა წერეთელი მიხეილ გოგუაძე ელა სხრიტლაძე ნათია ჭინჭარაული ანასტასია მოწონელიძე |
 |
From CU to KU
კავკასიის უნივერსიტეტის ექვსმა სტუდენტმა ბარგი ჩავალაგეთ და სტამბულში წამოვედით, რთული არ იყო ოჯახისა და მეგობრების დატოვება, რადგან მოუთმენლად ველოდით იმ თავგადასავალს, რომელსაც Erasmus+ის გაცვლითი პროგრამა ჰქვია და რომელზეც მხოლოდ სხვების გამოცდილებიდან თუ გვსმენოდა რაიმე.
Erasmus+ის გაცვლითი პროგრამა ჩვენთვის რატომღაც ყოველთვის ევროპასთან ასოცირდებოდა, თუმცა მოულოდნელად აზიისა და ევროპის გასაყარზე - სტამბულში აღმოვჩნდით. ეს არის ქალაქი, რომელიც მხოლოდ ბოსფორის სრუტითა და აია სოფიით არ შემოიფარგლება, მსგავსი ტურისტული ადგილები მხოლოდ ფასადია, რომლის უკანაც, თუ კი შანსი მოგეცემათ, აუცილებლად უნდა შეიხედოთ, ჩვენ კი ამისთვის საკმარისზე მეტი დრო გვაქვს, რაც კიდევ უფრო საინტერესოს ხდის ჩვენს გაცვლით პროგრამას.
რაც შეეხება უნივერსიტეტს. ერთი სემესტრით თურქეთის მოწინავე უნივერსიტეტის სტუდენტები აღმოვჩნდით, რაც კიდევ ერთი ახალი გამოწვევაა ჩვენს ცხოვრებაში. ვსწავლობთ ბევრს, ვსწავლობთ საინტერესო საგნებს, გვყავს კვალიფიციური ლექტორები, რომლებიც მაქსიმალურად ცდილობენ კომფორტულად გვაგრძნობინონ თავი, ჯერ კიდევ ჩვენთვის უცხო გარემოში, და ყოველთვის მზად არიან პასუხი გასცენ ჩვენს ნებისმიერ შეკითხვას.
მოგვწონს გარემო, მეგობრები, რომლებიც აქ შევიძინეთ, უნივერსიტეტის საცხოვრებელი, ბიბლიოთეკა, სადაც შეგვიძლია დღისა და ღამის ნებისმიერ დროს მივიდეთ და ვიმეცადინოთ. ვცდილობთ მაქსიმალურად დავტკბეთ თითოეული წამით და ახალი უნარებითა და გამოცდილებით დავბრუნდეთ უკან. უსიტყვოდ ვთანხმდებით, რომ აქ გატარებული ერთი სემესტრი სამუდამოდ დაილექება ჩვენს გონებაში, როგორც ერთ-ერთი საუკეთესო დღეები, კვირები თუ თვეები.