კავკასიის უნივერსიტეტის აფილირებულმა პროფესორმა და „ჯეოქეისის“ საგარეო პოლიტიკის მიმართულების ხელმძღვანელმა, ხათუნა ბურკაძემ საერთაშორისო კონფერენციაზე - „განათლება, ტექნოლოგიები და ინოვაციები“ - უმაღლეს საგანმანათლებლო დაწესებულებებში ხელოვნური ინტელექტის დანერგვის შესაძლებლობებზე ისაუბრა.

პროფესორმა ხათუნა ბურკაძემ აღნიშნა: „ხელოვნური ინტელექტის მახასიათებლები   მიუთითებენ იმაზე, რომ ხელოვნური ინტელექტის სისტემების დანერგვა  განათლების პოლიტიკის შემუშავებისა და განხორციელების პროცესში შესაძლებელია. AI მნიშვნელოვანი ინსტრუმენტია ციფრული ტრანსფორმაციის დასაჩქარებლად, რომელიც მომხმარებლებს საშუალებას აძლევს, ავტომატიზებული მიდგომის გამოყენებით, მიიღონ დროული და თანმიმდევრული გადაწყვეტილებები. AI-ს მეშვეობით შესაძლებელია უმაღლეს საგანმანათლებლო დაწესებულებებში ინოვაციური მიდგომების განვითარება, რაც ხელს შეუწყობს განათლების უფრო ხელმისაწვდომობასა და სწავლა-სწავლების პროცესის ეფექტიანობის გაუმჯობესებას.

უმაღლეს საგანმანათლებლო დაწესებულებებში  ხელოვნური ინტელექტის დანერგვა განაპირობებს შემდეგი ამოცანების უკეთ განხორციელებას: 1) სწავლა-სწავლების პროცესის გამარტივებას, განსაკუთრებით დისტანციურად; 2) ჭკვიანი ასისტენტის კონცეფციის შემუშავებას, რომელიც გულისხმობს დახმარებას როგორც პროფესორებისთვის, ასევე სტუდენტებისთვის ინფორმაციის მოძიების, მონაცემთა დამუშავებისა და რუტინული ფუნქციების შესრულების პროცესში (ეს დახმარება აკადემიურ სტანდარტებთან უნდა იყოს შესაბამისობაში); 3) ინდივიდუალურ საჭიროებებზე ორიენტირებული საგანმანათლებლო პროგრამებისა და კურსების შექმნას; 4) უმაღლეს საგანმანათლებლო დაწესებულებებში ადმინისტრაციული ამოცანების დროულად შესრულებას“.

„ამავდროულად, ხელოვნური ინტელექტის მასშტაბებისა და შესაძლებლობების ზრდის ფონზე, ეთიკურ და სამართლებრივ ჩარჩოს შეუძლია უზრუნველყოს სანდო ხელოვნური ინტელექტის კონცეფციის შემუშავება და განმარტოს ხელოვნური ინტელექტის სისტემების კანონიერი მიზნები ძირითად სფეროებში, მათ შორის განათლების პოლიტიკაში. ეს აუცილებელია ხელოვნური ინტელექტის უკანონო გამოყენების თავიდან ასაცილებლად. ამავდროულად, ადამიანის უფლებები უნდა იყოს დაცული. ასევე, შესაბამისი მიზნების მისაღწევად, ხელოვნური ინტელექტის სისტემები უნდა ეფუძნებოდნენ ობიექტურ ინფორმაციას. ასეთი მონაცემების დამუშავებით ისინი შეძლებენ სწორი დასკვნების გაკეთებას და ადამიანების დახმარებას სხვადასხვა ამოცანების ეფექტიანად შესრულებისას, განსაკუთრებით ავტომატიზებული მიდგომის გამოყენებით რუტინული ამოცანების განხორციელებისას, მათ შორის უმაღლეს საგანმანათლებლო დაწესებულებებში“, - განაცხადა პროფესორმა ხათუნა ბურკაძემ.