4 აპრილს, კავკასიის უნივერსიტეტში, ქართული ენის დღეების შემაჯამებელი ღონისძიება გაიმართა, სადაც ცნობილ ქართველ პოეტსა და ფოლკლორისტს, პროფესორ ეთერ თათარაიძეს გადაეცა  კავკასიის უნივერსიტეტის მიერ დაარსებული ჯილდო - „ქართული ენის ქომაგი“, რომელიც,  განსაკუთრებული წვლილისა და გამორჩეული იდეების განხორციელებისათვის, ყოველწლიურად გადაეცემა ცნობილ ქართველოლოგებსა თუ ქართული ენის პოპულარიზაციის ხელშემწყობ ქართველ და უცხოელ მკვლევრებს.

ღონისძიებას დაესწრნენ: ნუნუ მიცკევიჩი - განათლების საერთაშორისო ცენტრის ხელმძღვანელი, საულიუს ვალაინისი - ლიეტუვის საგანგებო და სრულუფლებიანი ელჩის მოადგილე საქართველოში და სხვა საპატიო სტუმრები.

ღონისძიების ფარგლებში მოეწყო დავით მაისურაძისა და გიორგი სისაურის კალიგრაფიული ნამუშევრების გამოფენა; შედგა ეთერ თათარაიძის ლექსების ბილინგვური (ქართულ-უკრაინული) კრებულის „ლექს ვარ ჯერაც გასაშიფრ“ პრეზენტაცია; დაჯილდოვდა მართლწერის ვიქტორინაში გამარჯვებული გუნდი - მათ ლიეტუვის პარლამენტიდან გამოგზავნილი საჩუქრები გადასცა საქართველოში ლიეტუვის საგანგებო და სრულუფლებიანი ელჩის მოადგილემ საულიუს ვალაინისმა.

ღონისძიებაზე სიტყვით გამოვიდნენ:

მარიამ მანჯგალაძე - კავკასიის უნივერსიტეტის პროფესორი, პროექტის ავტორი

კახა შენგელია - კავკასიის უნივერსიტეტის პრეზიდენტი

ნუნუ მიცკევიჩი - განათლების საერთაშორისო ცენტრის ხელმძღვანელი

საულიუს ვალაინისი - ლიეტუვის საგანგებო და სრულუფლებიანი ელჩის მოადგილე საქართველოში

ეთერ თათარაიძე - ქართველი პოეტი და პროფესორი

ნატალია ტროხიმი - უკრაინელი მწერალი და მთარგმნელი

ასევე, ლიტერატურის კრიტიკოსი ნინო ვახანია, მთარგმნელი - მაია თარგამაძე და სხვა მოწვეული სტუმრები.

ღონისძიების ბოლოს გაიმართა კავკასიის უნივერსიტეტის ფოლკლორული ანსამბლის საჩვენებელი კონცერტი. 

24 მარტიდან 4 აპრილის ჩათვლით,  პროფესორ მარიამ მანჯგალაძის ინიციატივითა და კავკასიის უნივერსიტეტის ორგანიზებით, ქართული ენის დღეების ფარგლებში, სხვადასხვა ღონისძიება ჩატარდა, მათ შორის: მასტერკლასი - „კალიგრაფიის ხელოვნება - მოგზაურობა წარსულიდან მომავალში“, მართლწერის ვიქტორინა - „ვწერ და ვმეტყველებ გამართული ქართულით!“, დისკუსია - ენა და დიალექტი; ფერეიდნული დიალექტის მარგალიტები; შემოქმედებითი დიალოგი: „დიალექტები - დედამდინარეში ჩამდინარე ნაკადულები“ (საქართველოსა და უკრაინის მაგალითი).

„ქართული ენის ქომაგის“ ჯილდო დამზადებულია Lepert Arts-ის მიერ.

პროექტის მხარდამჭერები იყვნენ:

• სახელმწიფო ენის დეპარტამენტი
• საქართველოს კალიგრაფთა ასოციაცია
• ლიეტუვის პარლამენტის საქართველოს მხარდამჭერთა კომიტეტი
• ლიეტუვის საელჩო საქართველოში
• საქართველოს პარლამენტის ეროვნული ბიბლიოთეკა