ფსიქოლოგიის ერთობლივი პროგრამა ხორციელდება ქეინის უნივერსიტეტთან პარტნიორობით. პროგრამაზე სწავლის ხანგრძლივობა შეადგენს 3 აკადემიურ წელს. პირველი ორი წლის განმავლობაში სტუდენტები ისწავლიან კავკასიის უნივერსიტეტში, ხოლო მესამე წელს სწავლას გააგრძელებენ და დაასრულებენ ამერიკის შეერთებულ შტატებში, ქეინის უნივერსიტეტში. პროგრამის დამთავრების შემდეგ კურსდამთავრებული აიღებს ორ დიპლომს - კავკასიის უნივერსიტეტის და ქეინის უნივერსიტეტის.
მისანიჭებელი კვალიფიკაცია:
1. კავკასიის უნივერსიტეტი - ფსიქოლოგიის ბაკალავრი;
2. ქეინის უნივერსიტეტი (აშშ) - ჰუმანიტარული მეცნიერებების ბაკალავრი ფსიქოლოგიაში.
პროგრამის განხორციელებაში ჩართულია კვალიფიციური აკადემიური პერსონალი, რომელიც მრავალი წელია, ეწევა აკადემიურ და პრაქტიკულ საქმიანობას ფსიქოლოგიის მიმართულებით როგორც საქართველოში, ისე ამერიკის შეერთებულ შტატებში.
ფსიქოლოგიის საბაკალავრო პროგრამა იყენებს სტუდენტზე ორიენტირებულ, მტკიცებულებებზე დაფუძნებულ სასწავლო მეთოდების ფართო სპექტრს, რომელიც მიზნად ისახავს აქტიური ჩართულობის, კრიტიკული აზროვნებისა და პრაქტიკული კომპეტენციის განვითარებას. პროგრამა აერთიანებს ტრადიციული სწავლების ფორმებს ინტერაქტიულ, გამოცდილებაზე დაფუძნებულ და კვლევაზე ორიენტირებულ მიდგომებთან, რათა უზრუნველყოს როგორც თეორიული ცოდნის, ისე გამოყენებითი უნარების განვითარება.
ფსიქოლოგიის ერთობლივი პროგრამის კურსდამთავრებული შეძლებს დასაქმდეს განათლების, ჯანდაცვის, მართვის, წარმოებისა და ბიზნესის, მოსახლეობის სოციალური დახმარების სფეროში და სხვ. კერძოდ, ეს შეიძლება იყოს კვლევითი ორგანიზაციები, საზოგადოებრივი აზრის შემსწავლელი ცენტრები; ტრენინგის ცენტრები; ბავშვთა და მოზრდილთა სტაციონარები; ბავშვთა და მოზრდილთა პოლიკლინიკა; ბავშვთა და მოზრდილთა სარეაბილიტაციო ცენტრები; ბავშვთა და მოზრდილთა საკონსულტაციო ცენტრები; სპეციალიზებული საბავშვო დაწესებულებები (საბავშვო ბაღი და სკოლა); სარეკლამო და PR ინდუსტრია; საკონსულტაციო დიაგნოსტიკური ცენტრები; კერძო პრაქტიკა და ა.შ.