კავკასიის უნივერსიტეტმა გერმანიის გამოყენებით მეცნიერებათა უმაღლესი სასწავლებლების, კერძოდ 19 სასწავლებლის, რექტორების დელეგაციას უმასპინძლა.

დელეგაცია კავკასიის უნივერსიტეტის პრეზიდენტმა, კახა შენგელიამ მიიღო. ვიზიტი გერმანიის აკადემიური გაცვლის სამსახურის (DAAD) მხარდაჭერით განხორციელდა და მიზნად ისახავდა ქართულ და გერმანულ უმაღლეს სასწავლებლებს შორის თანამშრომლობის გაღრმავებას.

ვიზიტის პროგრამა რამდენიმე ეტაპს მოიცავდა. პირველ ეტაპზე, მრგვალი მაგიდის ფორმატში, კავკასიის უნივერსიტეტის პრეზიდენტმა კახა შენგელიამ და ვიცე-პრეზიდენტმა ირენა მელუამ სტუმრებს უნივერსიტეტის ძირითადი მიღწევები და ინტერნაციონალიზაციის პრიორიტეტები გააცნეს. დისკუსიაში აქტიურად იყვნენ ჩართულნი გერმანელი პარტნიორები, რის შედეგადაც გამოიკვეთა თანამშრომლობის ახალი მიმართულებები ხელოვნური ინტელექტის, ინჟინერიის, მდგრადი ფინანსების კუთხით.

ვიზიტის მთავარი მიზანი კავკასიის უნივერსიტეტთან ერთად იმ კერძო და სახელმწიფო უნივერსიტეტების გაცნობა იყო, რომლებიც ქართულ საგანმანათლებლო ბაზარზე აქტიურად არიან წარმოდგენილი. ამ მიზნით, კავკასიის უნივერსიტეტმა, DAAD-თან ერთად უმასპინძლა 10 ქართულ უმაღლეს სასწავლებელს და მათ საშუალება მისცა, გერმანელ პარტნიორებთან ერთად განეხილათ თანამშრომლობის სამომავლო პერსპექტივები. 

დელეგაციის შემადგენლობაში კავკასიის უნივერსიტეტის პარტნიორი უნივერსიტეტების წარმომადგენლებიც შედიოდნენ, რომელთან ერთადაც კავკასიის უნივერსიტეტი უკვე ახორციელებს სტუდენტთა, აკადემიური და ადმინისტრაციული პერსონალის მობილობას. აღნიშნული მასშტაბური შეხვედრა კიდევ უფრო აფართოებს კავკასიის უნივერსიტეტის შესაძლებლობებს გერმანიაში და ახალ პერსპექტივებს უხსნის მომავალ ერთობლივ პროექტებს.